ભુજ કબીર મંદિરના મહંતશ્રીએ શ્રી રામદેવ સેવાશ્રમમાં પહોંચી માનસિક દિવ્યાંગોને સ્વહસ્તે ભોજન કરાવ્યું

ભુજ સ્થિત કબીર મંદિર દ્વારા છેલ્લા 20 વર્ષથી દર પૂનમના દિવસે માનવજ્યોત સંસ્થા સંચાલિત શ્રી રામદેવ સેવાશ્રમ, પાલારા-કચ્છ ખાતે રહેતા માનસિક દિવ્યાંગો તેમજ એકલા, અટુલા અને નિરાધાર વૃદ્ધ વડીલો માટે ટિફિન સેવાના ભાગરૂપે તૈયાર રસોઇ આપવામાં આવે છે. આ સેવાકીય પરંપરા વર્ષોથી અવિરત રીતે ચાલુ રહી છે.

આ સેવાકીય કાર્યક્રમ અંતર્ગત કબીર મંદિરના મહંતશ્રી કિશોરદાસજી સાહેબ શ્રી રામદેવ સેવાશ્રમ ખાતે પધાર્યા હતા. તેમણે સેવાશ્રમમાં નિવાસ કરતા માનસિક દિવ્યાંગોને સ્વહસ્તે ભોજન કરાવી આત્મીયતા અને માનવતાનો અનોખો સંદેશ આપ્યો હતો. આ પ્રસંગે તેમણે માનવજ્યોત સંસ્થા દ્વારા કરવામાં આવતી નિઃસ્વાર્થ સેવા અને સમાજોપયોગી પ્રવૃત્તિઓની પ્રશંસા કરી હતી.

આ પ્રસંગે માનવજ્યોત સંસ્થાના પ્રબોધ મુનવર તથા પૃથ્વીરાજસિંહ જાડેજા દ્વારા મહંતશ્રી કિશોરદાસજી સાહેબનું સન્માન કરવામાં આવ્યું હતું. સાથે જ તેમના ઉત્તમ આરોગ્ય, દીર્ઘાયુષ્ય અને તેઓ સમાજસેવાના આવા કાર્યોમાં સતત પ્રેરણાસ્ત્રોત બની રહે તેવી શુભેચ્છાઓ પાઠવવામાં આવી હતી.

માનવતા, સેવા અને કરુણાની ભાવનાને ઉજાગર કરતો આ પ્રસંગ ઉપસ્થિત સૌ માટે પ્રેરણાદાયી બન્યો હતો.