રાજસ્થાનનાં પરિવારજની મુશ્કેલીનો 3 વર્ષે અંત આવ્યો માતા-પુત્ર નું થયું મિલન

રાજસ્થાનનાં પાલી વિસ્તારનો યુવાન અરવિંદ ઉ.વ. 40 ગુમ થતાં પરિવારજનોએ સતત ત્રણ વર્ષ સુધી તેની શોધખોળ ચલાવી હતી. તેનાં કોઇ ખબર નમળતાં પરિવારજનો મુશ્કેલી વેઠી રહ્યા હતા. આખરે તે રખડતો-ભટકતો સૂરતનાં જીવન જ્યોત આશ્રમે પહોંચ્યો હતો. ત્યાનાં સંચાલક અને ટ્રસ્ટનાં સેવાભાવીઓએ તેની ખૂબ જ સરભરા કરી સારી સારવાર
કરાવી હતી.

માનવજ્યોત સંસ્થા ભુજ સંચાલિત શ્રી રામદેવ સેવાશ્રમ પાલરા કચ્છનાં સામાજિક કાર્યકર રીતુબેન વર્મા સુરત આશ્રમની મુલાકાતે ગયેલા ત્યારે આ યુવાનને સાથે તેડી આવી રાજસ્થાન પોલીસની મદદ લઇ તેનું ગામ પરિવાર શોધી કાઢ્યા હતા.

સમાચાર પ્રાપ્ત થતાં જ તેની માતા, ભાઇ ભુજ આવી પહોંચ્યા હતા. માતા-પુત્રનું 3 વર્ષ પછી મિલન થતાં ભાવુક દ્રશ્યો સર્જાયા હતા. પરિવારજનોએ અનહદ ખુશી વ્યક્ત કરતાં જણાવ્યું હતું કે, અમારી 3 વર્ષની મુશ્કેલીનો અંત આવ્યો છે. પુત્ર હેમખેમ મળી આવતાં માતા અને તેનાં ભાઇએ સૂરત-ભુજની સંસ્થાઓનો આભાર માન્યો હતો. આજે તે 43 વર્ષનો થઇ પોતાનાં પરિવાર સુધી પહોંચ્યો છે.

માનવતાનાં આ કાર્યમાં પ્રબોધ મુનવર, આનંદ રાયસોની, પંકજ કુરુવા, દિલીપ લોડાયા, દામજીભાઇ મૈશેરી સહભાગી બન્યા હતા.